Link açıqlığı

Saatnıñ esas haberi

Kiyevde qırımtatarlarnıñ sürgünligi hatırasına keçirilgen ders yarışınıñ ğalipleri ilân etildi


Kiyevde «18.05 hatıra aqqı» ders yarışınıñ ğalipleri ilân etildi. İşbu derslerniñ mevzusı 1944 senesi qırımtatarlarnıñ sürgünligi oldı. Yarış Ukrainada 2015 senesi mayıs ayından keçirile edi.

Qırım.Aqiqat bildirgeni kibi, birinci yerni veb-kvest aldı. Yarış teşkilâtçıları aytqanı kibi, oqutuvnıñ bu kibi şekli – ukrain tasiliniñ kelecegidir.

«Bugün biz sınıf işinden çetleşmek kerekmiz ve siziñ dersiñiz – ögge yapılğan bir adımdır», – dep muracaat etti iş müelliflerine yarış teşkilâtçılarından biri, «Almenda» vatandaşlıq maarifçiligi merkeziniñ reisi muavini Valentina Potapova.

Müellifler – Dmitriy Desâtov ve Anna Sizova – Nikolayev vilâyetinde çalışqan ocalardır. Farqlı şeerlerde yaşap, leyhanı bir-birinden uzaqlıqta işlep çıqarğanlar. Desâtov ve Sizova aytqanı kibi, sıq körüşip olamağanından virtual sınıfnı teşkil ettiler ve mında leyha üzerinde iş bir ay devam etkendir. Öz misalinde ocalar ortaq leyhalarnı işlep çıqarmaq ve oqumaq içün mesafe keder etmegenini kösterip oldılar.

Umumen yarışta Ukrainanıñ 19 vilâyetinden 73 iş iştirak etti. Donetsk vilâyetinden ocalarnıñ iştiraki faal oldı. Regionnıñ faaligini tasdiqlağan delil – ekinci yerni Rusiye separatistleri tarafından nezaret etilgen «DNR» zonasından mütehassıs aldı.

Havfsızlıq noqtaiy nazarından oca adını aytmamaq rica etti, çünki yerli akimiyet bütünukrain yarışlarında iştirak etmege yasaq ete, – deyler teşkilâtçılar.

Yarış ğalipleri para mukâfatını elde ettiler – 1500-5000 grivna.

XS
SM
MD
LG