Link açıqlığı

Meclis binasından qırımtatar bayrağı, levhaçıq ve nezaret kameralarını alıp taşladılar


Aqmescitte, cumaaqşamı künü, iyün 4-de, belgisiz şahıslar Qırımtatar Milliy Meclisi bulunğan binadan qırımtatar milliy bayraqnı, em de kiriş ögünde asılğan levhaçıq, nezaret kameralarını qoparıp aldılar.

Qırım.Aqiqatqa şaatlarnıñ aytqanına köre, bayraqnıñ olmağanını olar saba qayd ettiler, kündüz ise nezaret kameraları, levhaçıqlar yoq oldı.

«Bunı kim yaptı, belgisiz. O vaqıt olğanı kibi, qapı açılğan, bayraq tüşürilgen, amma soñra onı kene yerine astılar», – dey şaat.

Saat 17:00 yaqın binağa politsiya maşinası keldi. Mında advokat Cemil Temişev ve «Larişes» Qırım tarih müzeyiniñ tesisçisi Güliver Altın endi buluna edi.

Meclis binası. Aqmescit
Meclis binası. Aqmescit

Ne Qırımnıñ uquq qoruyıcı organlarında, ne Qırımtatar Milliy Meclisinde işbu ziddiyetni izaatlamaylar.

Qırım.Aqiqat bildirgeni kibi, Aqmescitte iyün 1-de aqşam belgisiz şahıslar Şmidta, 2 adresi boyunca Qırımtatar Milliy Meclisi yerleşken binanıñ qapusını açıp, milliy bayraqnı alıp taşladılar.

2014 senesi sentâbr ayında belgisiz şahıslar Aqmescitteki Meclis binasından bayraqnı alıp taşladılar.

2014 senesi sentâbr 16-da Şmidta, 2 adresi boyunca Aqmescitteki Qırımtatar Milliy Meclisiniñ binasında on eki saatlik tintüv keçirilgen edi. Neticede vesiqa, protokol, islâm edebiyatı ve bilgisayarlar alındı.

Sentâbr 17-de Meclis binasına mahkeme vekilleri kelip, bu bina ve «Qırım» Fondu» Hayriye teşkilâtına ait daa altı binanıñ tevqifi aqqında tenbiyelediler. Sentâbr 19-da Meclis binası müürlengen edi.

Kiyev rayonı mahkemesi «Qırım» Fondu» HT müdiri Riza Şevkiyevni 350 biñ rublelik para cezası ile cezalandırmağa, fondnı ise 4,5 million rublelik para cezası ile cezalandırmağa qarar aldı.

Qırımnıñ Rusiye ükümetiniñ milletlerara munasebetler ve sürgün olunğan grajdanlarnıñ işleri boyunca devlet komitetiniñ reisi Zaur Smirnov bildirdi ki, «Qırım» Fondu» Hayriye teşkilâtınıñ mal-mülki Qırım musulmanları Diniy idaresine berilmek kerek. Bu teşebbüs Qırım yolbaşçısı Sergey Aksenovğa seslendirilgen edi.

Soñra peyda olğan malümatqa köre, «Qırım» Fonduna» ait binada hanlar devriniñ «Kalga-sultan» tarih ve medeniyet müzeyini açacaqlar.

XS
SM
MD
LG