Kiyevde Qırım sakinleri ve Qırımdan köçip kelgenler içün Aqmescit Künü munasebeti ile tedbirlerni teşkil eteler.
Bunı Qırım.Aqiqatqa Ukrainada köçip kelgenlerniñ meseleleri ile oğraşqan «Qırım diasporası» cemaat teşkilâtı bildire.
Teşkilâtçılarnıñ malümatına köre, Aqmescit Kününi «Qırım – Aqmescitni sevemiz» beşinci körüşüvniñ çerçivesinde Kiyevde iyün 6-da qayd etecekler.
Körüşüv vaqtında cumaaertesi künü saat 16:00 Aqmescit boyunca virtual kezinti keçirilecektir. Tedbirde iştirak etmege istegenlerge internet-formanı toludrmağa teklif eteler.
Aqmescit şeer künü adet üzre yaznıñ ilk raatlıq künleri qayd etile.
Rusiye tarafından Qırımnıñ 2014 senesi mart ayındaki işğalinden sebep insanlar yarımadadan qıtaiy Ukrainağa köçmege başladılar.
Ukraina Fevqulâde vaziyetler boyunca Devlet hızmetiniñ malümatına köre, mayıs 28 kününe qıtaiy Ukrainada Qırımdan köçken 20 biñ 653 insan qayd etilgen. Mecliste bildirilgeni kibi, Qırımdan köçip kelgen 20 biñ insandan yarısı – qırımtatarlarıdır. KrımSOS cemaat teşkilâtınıñ malümatına köre, aqiqaten yarımadanı 45-50 biñ insan terk etti.
