Link açıqlığı

Rusiye mahkemesi Cemilevniñ oğluna ükümni seslendirmek yerine teneffüsni ilân etti – adliyeci


Qırımtatarlarnıñ milliy lideri Mustafa Cemilevniñ öldürüvde qabaatlanğan oğlu Hayserge mahkeme ükümi çıqarılmadı. Krasnodar ülkesiniñ mahkemesi iyün 10-ğa qadar teneffüsni ilân etti.

Bunı Hayser Cemilevniñ adliyecisi Nikolay Polozov bildire.

Onıñ malümatına köre, mahkemede qabaat tarafı Hayserni 5 yıl ve 6 ayğa qadar azatlıqtan marum qaldırmağa rica etti.

«Müimi şu ki, diqqatsızlıqtan yapılğan öldürüv afu etile, Cemilev 2 yıldan ziyade apiste yata, bu da sayıla», – dep qayd etti adliyecisi.

İyün 2 künü Krasnodar mahkemesinde mahkemeci olmağanlar maqsatlı öldürüvde qabaatlanğan Hayser Cemilevni aqladılar. Ömür cezasını belgilegen öldürüv qabaatı lâğu etildi. Cemilevniñ imayesi qarardan memnün qaldı.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG