Link açıqlığı

Yaqalanğan qırımtatarını azat ettiler, oña qoltutqanlarnı ise memuriy protokollar bekley – Smedlâyev


Qırımtatar Milliy Qurultayı Merkeziy saylav komissiyasınıñ reisi Zair Smedlâyev bildire ki, iyün 4-te Aqmescit civarında belgisiz şahıslar tarafından yaqalanğan Riza İzetovnı azat ettiler, oña qoltutmaq içün FSB binasına kelgenlerni ise memuriy protokollar bekley.

«FSB-de bazı tedbirlerden soñ Riza İzetovnı evge yiberdiler, lâkin belgisiz şahıslarnıñ kim olğanını ve ne sebepten yaqalağanlarını ögrenmege tırışqan insanlarğa Kiyev rayon bölüginde şahsiyetlerini belgilep, memuriy protokollar tizecekler, olarnıñ yanında adliyeci Emil Kurtbedinov buluna», – dep yazdı o Facebookta.

İnsan aqları Qırım alan missiyasınıñ Qırım.Aqiqatqa bergen malümatına köre, politsiya hadimleri adamlarnı şahsiyetlerini belgilemek içün yaqaladılar ve Qırım İçki işler nazirliginiñ Kiyev rayon bölügine ozğardılar.

Qırımtatar milliy areketiniñ faali, Qırımtatar Milliy Qurultayı Merkeziy saylav komissiyasınıñ reisi Zair Smedlâyev iyün 4-te Aqmescit civarında daa bir qırımtatarı Riza İzetov yaqalanğanını bildirgen edi.

XS
SM
MD
LG