Link açıqlığı

Saatnıñ esas haberi

Mustafa Cemilev: Kırgızistan reberligi Moskvanı memnün etmek istey


Ukraina Yuqarı Radasınıñ deputatı Mustafa Cemilev
Ukraina Yuqarı Radasınıñ deputatı Mustafa Cemilev

Ukraina Yuqarı Radasınıñ deputatı Mustafa Cemilev Bişkek ava limanında Cemilev ve Ümerovnıñ yaqalanması ile bağlı malümatlarğa Kırgızistan Tış işler nazirligi Ukrainağa yollağan cevabını izaatladı.

«Kırgızistan reberliginiñ Moskvanı memnün etmek istegini añlayım, lâkin er bir areket ve lafnıñ mantığı olmaq kerek. Birinciden, Moskva bunı yañlış tanısa, bizim alâqamız yoq, siziñ deputatıñız er şeyni uydurdı, dep aytmaq kerek edi. Ekinciden, Kırgızistan qabaatını tanıp afu soradı. Lâkin sebepleri doğruğa oşamay», – dep ayttı Mustafa Cemilev.

«Tecribemiz bar. Misal olaraq, New Yorkta tamır halqlarınıñ kongressi keçirilgen edi. Rusiye menim ya da Refat Çubarovnıñ iştirakine qarşı çıqtı. Moskva Qırım Rusiye olğanını aytıp, vatanından quvulğan bizler Qırım adından aytamağanımıznı qayd etti. OSCE Parlament Assambleyası arfesinde de aynısı oldı. Kreml qarşı çıqıp, kendi qoqlalarını yollaycaq oldı. Rusiye içün adamlarnı qaçıruv ve öldürüv kibi titiz bir mesele baqılacaq konferentsiyağa qırımtatarlarnı kirsetmemege tırışqanlarnı tapmaq içün pek çoq ğayret de kerekmey. Yipler Moskvağa alıp kete», – dep qayd etti Cemilev.

Radio Azattık bildire ki, Mustafa Cemilevniñ fikirince, Kırgızistan Tış işler nazirliginiñ beyanatı – «mında kirişmege istemegen ve hızmetçilerine böyle-böyle yapacaqsıñız dep emir etken Rusiyeni yahşı taraftan köstermek ıntıluvıdır».

Malüm olğanı kibi, iyün 3-te Kırgızistan Tış işler nazirligi Ukraina Tış işler nazirligine muracaat etip, Yuqarı Rada deputatı Mustafa Cemilevniñ beyanatını izaatladı. Nazirlik «iyün 2-de Mustafa Cemilevniñ şahsiy internet saifesinde Kırgızistan Cumhuriyetine aytqanlarını» begenmedi.

Ukraina Yuqarı Radasınıñ deputatı, qırımtatar halqınıñ milliy lideri Mustafa Cemilev Bişkek ava limanında olıp keçken vaqianı Rusiye emri ile bağlay. «Bizim elde etken malümatımızğa köre, Moskvalı büyük ağanıñ emri oldı» – dep ayttı o.

İyün 2-de gece Ukraina Yuqarı Radasınıñ deputatı, qırımtatar halqınıñ milliy lideri Mustafa Cemilev ve mesleatçısı, Qırımtatar Milliy Qurultayınıñ delegatı Rustem Ümerovnı üç saat Bişkek ava limanında nezaret altında tuttılar.

Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire ki, Ukraina Tış işler nazirliginiñ vekilleri bergen malümatına köre, Kırgızistan tarafı Bişkek ava limanında olıp keçken vaqia içün Ukrainadan afu soradı.

XS
SM
MD
LG