Almaniya kantsleri Angela Merkel G7 sammiti arfesinde Rusiyeniñ Qırım işğalini dünya toplulığı içün Ebola virusı ve Yaqın şarqta terroristik teşkilâtlarnıñ faaliyeti ile aynı derecede telükeli olğan eñ büyük havf dep adladı.
Bu aqqında Globe and Mail gazetasında Angela Merkelniñ derc etilgen maqalesinde aytıla.
«Suvuq cenkten 25 yıl keçken soñ Avropa nizamını Qırım işğali bozacaq, dep tasavvur etmek mümkün edimi? Ya da Ebola virusınıñ tarqatılması bir sıra Afrika memleketiniñ inkişafını toqtatacağını, Yaqın şarqta ise islamist terroristik teşkilâtlar eki devlette hilâfet tiklemege tırışacağını tüşünmek mümkün edimi?», – dep aytıla maqalede.
Merkelniñ fikirince, G7 sammitiniñ kün tertibinde olğan bu meseleler «halqara toplulığınıñ cevabını talap eteler».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
