2015 senesi mayısta Rusiyede ekstremistik malümatlar cedveli resmiy şekilde 9 kere deñiştirildi. Oña yır, video levhaları, musulman kitaplarınıñ neşirleri kirsetildi.
Bu aqqında Rusiyede milletçilik ve ksenofobiya, din ve cemaat munasebetleri, em de insan aqlarına riayet etüv ile oğraşqan «SOVA» malümat-analitik merkeziniñ esabatında aytıla.
Esabatqa binaen, cedvelde aşağıdaki adlar qoşuldı: natsi-skinhedlerniñ yañı video levhaları, «Korroziya Metalla» taqımınıñ yırları, N.V.Beloglazovnıñ «Yevreystvo i Rossiya. Kratkiy istoriçeskiy öçerk» kitabı, boyeviklerniñ video levhalarından başlap Rusiyede yasaq etilgen «Hizb ut-Tahrir» musulman malümatlarına qadar, «Krepost musulmanina», «Osnovı verı v svete Korana i Sunnı» kitaplarınıñ üç neşiri, «Svideteli İyegovı» metnleri, radikal-devletke qarşı malümatlar, şu cümleden politsiyağa qarşı levhalar, A.Litvinenko ve Yu.Felştinskiyniñ «FSB vzrıvayet Rossiyu» kitabı ve Yeniseysk sakininiñ saytı.
«SOVA» merkeziniñ malümatına köre, 2015 senesi mayıs ayında Moskva, Samara vilâyeti ve Habarovsk ülkesinde eñ azından 4 kişi rasist ve neonatsist ücümlarından zarar kördi. İlk malümatlarğa köre, 2015 senesiniñ birinci beş ayı devamında Rusiyeniñ 10 regionında 4 insan elâk oldı ve eñ azından 30 kişi yaralandı, 2 insan öldürüv qorquzuvlarını aldı.
