Rusiyede qırımtatarlarnıñ milliy lideri Mustafa Cemilevniñ oğlu Hayserniñ işi boyunca mahkemeciler olmağanlarnıñ qararı bu iş boyunca ukrain mahkemesiniñ qararı ile aynı, dep tüşüne Ukraina Yuqarı Radasınıñ deputatı Georgiy Logvinskiy.
Onıñ qayd etkenine köre, Hayser Cemilevniñ imayesi «bu vaziyette doğru areket etti, mahkemeciler ise sağlam bir qarar çıqardılar».
«Asılında, Rusiye mahkemesi ukrain mahkemesiniñ qararını tekrarladı. Ceza müddeti yaqalanğan 27.05.2013 kününden itibaren sayıla, 2 yıl endi keçti», – dep yazdı o Facebookta.
Aynı vaqıtta Cemilevniñ tuvğanları ve ortaqları mahkemeciler olmağanlarnıñ qararına qıymet kesmege aşıqmaylar. Olar mahkeme ükümini beklemege teklif eteler, bundan soñra qararğa qıymet kesmek mümkün deyler.
Tanışı Fevzi Edemovnı öldürgen Hayser Cemilev Rusiyede muqaytsızlıqtan yapqan öldürüvde qabaatlana. Böyle bir qararnı Krasnodar ülkesi mahkemesinde mahkemeciler olmağanlar qabul ettiler. İşbu qarar muzakere etilgen soñ mahkeme soñki qararnı çıqaracaq.
Ukrainada Hayserni «diqqatsızlıqtan yapqan öldürüvde» qabaatlap, 3 yıl ve 8 ayğa qadar azatlıqtan marum qaldırdılar.
Halq deputatı Georgiy Logvinskiyniñ malümatına köre, Ukraina Adliye nazirligi Rusiye Baş prokuraturasına muracaatta bulunıp, Hayser Cemilevniñ ekstraditsiyasını istey.
