Salı künü saat 17:00 Donbassta vaziyetniñ bir tertipke ketirilmesi boyunca üç taraflama kontakt gruppası Minskte körüşe. Bunı Twitterde Aqrusiye Tış işler nazirligi bildire.
«Ukraina boyunca üç taraflama kontakt gruppası Minsk toplaşuvları neticesinde iş gruppaları yolbaşçılarınıñ maruzalarını diñley», – denile beyanatta.
Evel Minskte Donbass vaziyetiniñ bir tertipke alınması boyunca üç taraflama kontakt gruppasınıñ iş gruppalarınıñ toplaşuvı başlandı, matbuat içün qapalı rejimde çalışqan ediler.
Fevralde Ukraina, Frenkistan, Almaniya ve Rusiye Donbassta fevral 15 kününden Donbassta ateşniñ toqtatılması aqta añlaşmanı qabul ettiler. Amma ziddiyet tarafları bir-birini añlaşma şartlarınıñ bozuluvında qabaatlay.
