Rusiye Tış işler nazirligi Türkiye eyyetiniñ qırımtatar halqınıñ vaziyetini ögrenmek içün kerçekleştirgen yarımada ziyaretinen bağlı Türkiye kütleviy haber vastalarında basılğan tenqit haberlerine açuvlana.
«Şunı aytmaq mecburmız ki, soñki vaqıtları Rusiye akimiyetiniñ cumhuriyette köstergen ğayretini tenqit etmek içün qırımtatar halqını alet olaraq qullanalar. Yarımadada «qırımtatarlarnı qaçıruv», «qırımtatar faallerini apiske aluv ve qanunsız tintüvler» aqqında haberler ardı-sıra peyda ola», – dep aytıla Rusiye Tış işler nazirliginiñ saytında.
Nazirlik Türkiye eyyetiniñ yarımada ziyaretine müsbet qıymet kesti.
«Bunıñ kibi körüşüvler qırımtatarlarnıñ vaziyetini yañlış tanıtqan suniy malümat ve teşviqat efsanelerini yoq etmege yardım etkenini tüşünemiz», – dep qayd ete nazirlik.
«Bizler bu meselede siyasetsiz yanaşmağa çağıramız. Yarımadada qırımtatar halqınıñ milliy-medeniy muhtariyetini şekillendirüv işi ketmekte, bunı Qırımnıñ «ukrain devrinde» tasavvur etmek bile zor edi», – dep aytıla beyanatta.
Rusiye Tış işler nazirligi emin ki, «qırımtatarlarnıñ müim problemleri siyasetnen bağlı degil, tam içtimaiy-gumanitar ve hocalıq problemleri, topraq damartılarınıñ uquqiy resmiyleştirilmesi, agrar meseleleri, qırımtatar cemiyetiniñ medeniy inkişafı ile bağlı meseleler bar».
Aprel ayınıñ soñunda Türkiye eyyeti Qırımnı ziyaret etti. Olar şimdiki akimiyet ve Qırımtatar Milliy Meclisiniñ vekillerinen körüştiler. Qırımnıñ Milletlerara munasebetler komiteti eyyet reberi Mehmet Üskül adından onıñ qırımtatarlarnıñ vaziyetinden memnün qalğanını bildirdiler. Üskül ise bunı red etti.
