Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire ki, Ukraina Tış işler nazirliginiñ vekilleri bergen malümatına köre, Kırgızistan tarafı bu gece Bişkek ava limanında olıp keçken vaqia içün Ukrainadan afu soradı, dep haber ete Qırım.Aqiqat. Mustafa Cemilevni ve mesleatçısı Rustem Ümerovnı üç saat Bişkek ava limanında nezaret altında tuttılar.
«Ukraina Bişkek konsullığı meseleni nezaret altına alıp, ileride bunıñ kibi vaqialarğa yol bermemek içün elinden kelgenini yapa», – dep bildireler vekâletliniñ ofisinde.
Qırım.Aqiqat bildirgeni kibi, gece Bişkek ava limanında politsiya 3 saat devamında Ukraina halq deputatı, qırımtatar halqınıñ milliy lideri Mustafa Cemilevni ve mesleatçısı Qırımtatar Milliy Qurultayınıñ delegatı Rustem Ümerovnı nezaret altında tuttı.
Ukraina prezidentiniñ qırımtatar halqı işlerinden vekâletlisi Mustafa Cemilevniñ ofisi Ukrainanıñ Kırgızistan konsullığı bu gece Bişkek ava limanında olıp keçken vaqianı ögrengenini ayttı. Kırgızistan uquq qoruyıcıları bunıñ kibi areketleri ile Vena konventsiyasını bozalar.
Berilgen malümatqa köre, Cemilev ve mesleatçısı Rustem Ümerov Kırgızistanda konferentsiyada iştirak eteler. Konferentsiyanıñ mevzusı – «Merkeziy Asiyada migratsiya meseleleri». Tedbirni Kırgızistan Cumhuriyetiniñ Jogorku Keneşi ve Avropa Şurasınıñ Parlament Assambleyası teşkil eteler.
