Qırımtatar Milliy Meclisi 2015 senesi avgust 16-da Herson vilâyetinde yerli Qırımtatar Meclisleriniñ saylavlarını keçirmege qarar aldı. Böyle bir qarar Meclis toplaşuvında keçken raatlıq künleri qabul etildi.
Bunı qırımtatar temsil organınıñ matbuat hızmeti bildire.
Berilgen malümatqa köre, toplaşuvda Meclisniñ 30 azasından 21 kişi iştirak etti, 10 insan, şu cümleden Meclis reisi Refat Çubarov internetten qoşuldılar. Qırımtatar Milliy Qurultayı Teftiş komissiyasınıñ reisi Ali Özenbaş da iştirak etti.
Qırımda faaliyet köstergen qırımtatar cemaat teşkilâtları vekilleriniñ II Bütündünya qırımtatar kongressinde iştiraki muzakere etildi.
Qırımnıñ Rusiye prokurorı Natalya Poklonskaya bildirdi ki, Qırımnıñ Rusiye FSB idaresiniñ taqiqat bölügi Qırımtatar Milliy Meclisiniñ reisi Refat Çubarovğa qarşı cinaiy iş açtı. O, onı qıdıruvğa ilân eteceklerini bildirdi.
«Qırımtatar qarşılıq areketi» teşkilâtı bildire ki, FSB qararınıñ maqsadı Türkiyede keçirilecek Bütündünya qırımtatar kongressiniñ keçirilmesine keder etmek.
2014 senesi Meclis reisine Rusiye ve Rusiye Federatsiyasınıñ nezareti altında bulunğan Qırımğa kirmege yasaq ettiler.
