Aqmescitte iyün 1-de aqşam belgisiz şahıslar Şmidta, 2 adresi boyunca Qırımtatar Milliy Meclisi yerleşken binanıñ qapusını açıp, milliy bayraqnı alıp taşladılar. Bunı Qırım.Aqiqatqa şaatlar bildirdi.
Olarnıñ malümatına köre, olar binanıñ ögünde keçip, binanıñ qapusı açıq olğanını, qapunıñ üstünde olğan bayraq ise qarşıda direkniñ yanında turğanını kördiler.
«Bizler içeri kirip, bir qaç kere qıçırdıq, amma kimse cevap bermedi, soñra tanışlarımızğa telefon etmege başladıq. Tahmin etkenimiz kibi, tanışlarımızğa telefon açqanda belgisiz şahıslar binanı ekinci çıqıştan terk ettiler», – dep qayd etti subetdeş.
Olarnıñ malümatına köre, birazdan Şmidta soq., 2 adresi boyunca qırımtatar milliy areketiniñ faalleri, şu cümleden Kurtseit Abdullayev, «Larişes» Qırım tarihiy müzeyiniñ tesisçisi Güliver Altın, adliyeci Cemil Temişev ve digerleri keldiler.
Şaatnıñ bildirgenine köre, Temişev özü binağa çıqıp, bayraqnı eski yerine tikledi.
«İç bir kimse uquq qoruyıcı organlarğa ariza yazmadı. Kelgen politsiya tezden ketti», – dep ayttı şaat. O, «bunıñ episi provokatsiyağa» oşağanını tüşüne.
Qırımnıñ uquq qoruyıcı organları ya da Qırımtatar Milliy Meclisi vaqianı izaatlamaylar.
2014 senesi sentâbr ayında belgisiz şahıslar Aqmescitteki Meclis binasından bayraqnı alıp taşladılar.
2014 senesi sentâbr 16-da Şmidta, 2 adresi boyunca Aqmescitteki Qırımtatar Milliy Meclisiniñ binasında on eki saatlik tintüv keçirilgen edi. Neticede vesiqa, protokol, islâm edebiyatı ve bilgisayarlar alındı.
Sentâbr 17-de Meclis binasına mahkeme vekilleri kelip, bu bina ve «Qırım» Fondu» Hayriye teşkilâtına ait daa altı binanıñ tevqifi aqqında tenbiyelediler. Sentâbr 19-da Meclis binası müürlengen edi.
Kiyev rayonı mahkemesi «Qırım» Fondu» HT müdiri Riza Şevkiyevni 350 biñ rublelik para cezası ile cezalandırmağa, fondnı ise 4,5 million rublelik para cezası ile cezalandırmağa qarar aldı.
Qırımnıñ Rusiye ükümetiniñ milletlerara munasebetler ve sürgün olunğan grajdanlarnıñ işleri boyunca devlet komitetiniñ reisi Zaur Smirnov bildirdi ki, «Qırım» Fondu» Hayriye teşkilâtınıñ mal-mülki Qırım musulmanları Diniy idaresine berilmek kerek. Bu teşebbüs Qırım yolbaşçısı Sergey Aksenovğa seslendirilgen edi.
Soñra peyda olğan malümatqa köre, «Qırım» Fonduna» ait binada hanlar devriniñ «Kalga-sultan» tarih ve medeniyet müzeyini açacaqlar.
