Link açıqlığı

Tam eki yıl evelsi, 2013 senesi iyün 1-de, Qırım efirinde Lâle bala telekanalı yayınğa başladı, dep haber ete 15 minut.

Eki yıl içinde bu kanal reytingniñ liderleri arasına kirdi. Kanalnıñ efirinde hadimleri azırlağan yayınlar ola edi, şu cümleden «Tatlı ses» – «ses», «oyun» ve «şiir» nominatsiyalarında istidatlar yarışı. «Lâle» telekanalı gençler içün «Balçoqraq» medeniyet-maarif yayınını ve kiçik aşçılarnıñ iştiraki ile «Aç oldım» yayınını azırlağan edi. «Ne bar ne yoq» haber yayını, gençler ve balalarnı dünya ile tanış etken «Küneş Nurları», em de kiçkineler içün «Aqşam masalı» olğan edi.

Eki aydan berli kanal Qırım efirinde yoq, lâkin muarririyeti işini devam ettire.

2014 senesi noyabr ayında Rusiyeniñ Devlet duması yarımadadaki kütleviy haber vastaları 2015 senesi aprel 1-ge qadar yarımadada ğayrıdan qayd olmaq kerekler, dep qarar aldı. Bundan evel Qırımda ukrain ruhset vesiqaları qabul etile edi.

ATR birinci qırımtatar telekanalınıñ mediaholdingine kirgen kütleviy haber vastaları, şu cümleden Lâle telekanalı Roskomnadzor iznini alıp olamadılar. Aprel 1-de gece olar işini toqtattılar.

XS
SM
MD
LG