Rusiyeniñ özek silâsını öz toprağında, şu cümleden Qırımda yerleştirmek aqqı bar, dep ayttı Rusiye Tış işler nazirliginiñ silânı tarqatmama ve nezaret departamentiniñ müdiri Mihail Ulyanov RİA Novosti agentligine.
«Rusiyeniñ, şübesiz, kerek olsa, öz milliy toprağında, şu cümleden Qırım yarımadasında özek silâsını yerleştirmek aqqı bar», – dep ayttı Ulyanov. O, Ukraina Tış işler naziri Pavlo Klimkinniñ mayıs ayınıñ ortasında Antalyada olıp keçken NATO nazirler körüşüvinde aytqanlarını izaatladı.
Rusiye Federatsiyasınıñ Mudafaa nazirligi cenk azırlığını teşkerüv çerçivesinde Tu-22M3 raketa taşıyıcılarınıñ Qırımğa avuştırılması aqqında bildirgen edi, olar özek silâsını taşıy bileler, lâkin bunıñ aqqında tam bir malümat berilmedi.
Ukraina Tış işler naziri Pavlo Klimkinniñ aytqanına köre, «Qırımda özek silâsınıñ yerleştirilmesi Rusiye tarafından halqara qaidelerniñ eñ ciddiy bozulması» olacaq, şu cümleden bir sıra halqara añlaşma, em de özek silâsını tarqatmamaq añlaşmaları bozulacaq.
«Rusiye tarafından Qırımda özek silâsınıñ yerleştirilmesinen bağlı yapılğan areketleri ya da qorquzuvları halqara qaidelerniñ eñ ciddiy bozulmasını olaraq tanılacaq. Böyle vaziyette halqara toplulıq cevap bermek kerek», – dep ayttı Klimkin.
«Añlaşıla ki, o, Qırımnı ukrain toprağı olaraq baqıp, anda Rusiye özek silâsınıñ yerleştirilmesi Ukrainanıñ özeksiz statusına zarar ketirecegini tüşüne. Meraqlı bir fikir, Amerika Qoşma Ştatlarına, Belgiya, Almaniya, İtaliya, Felemenk ve Türkiyege qarşı bir adım, çünki olarnıñ toprağında Amerikanıñ özek silâsı yerleşmekte. Ukraina naziriniñ mantığına köre, mezkür Avropa devletleriniñ özeksiz statusı bozula. Bunı red etmeycem, amma Qırım meselesinde vaziyet bam-başqa olğanını aytam», – dep cevap berdi Ulyanov.
Qırım.Aqiqat bildirgeni kibi, NATO Qırımda özek silâsı yerleştirilecek dep qasevetlene. NATO Baş kâtibi Jens Stoltenberg bildirdi ki, Rusiye tarafından özek silâsınıñ yerleştirilmesi aqqında kelgen haberler qasevet doğurmaqta. Stoltenberg bunı mayıs 27-de Washingtonda ayttı, bundan evel ise AQŞ prezidenti Barack Obama ile körüşken edi.
