Qırımtatar Milliy Meclis reisi Refat Çubarovğa qarşı cinaiy işniñ açılması aqta FSB qararı Türkiyede ötkerilecek Bütündünya qırımtatar kongressiniñ olmasına keder etmek maqsadı ile yapılğan mahsus arekettir, – denile Qırım.Aqiqatta olğan «Qırımtatarlarnıñ qarşılıq areketi» teşkilâtınıñ beyanatında.
Teşkilât azalarınıñ fikrine köre, ileride Rusiye uquq qoruyıcı organları İnterpolğa Çubarovnıñ halqara qıdıruvğa ilân etilgeni aqta bildirüvni yollaу bile.
Türkiye cumhuriyeti, İnterpol ögünde öz halqara mecburiyetlerini eda etip, Refat Çubarovnı yaqalap, Rusiyege bermege mecbur olacaq. Böyleliknen, Bütündünya qırımtatar kongressiniñ keçirilmesi sual işareti altında qalacaqtır. Türkiye Çubarovnı Rusiyege bermege razı olmasa, kongressniñ keçirilmesi qanunsız olacaqtır», – denile beyanatta.
Rusiye Federatsiyasınıñ uquq qoruyıcı organlarınıñ maqsadı – Bütündünya qırımtatar kongressine keder etmek
«Rusiye Federatsiyasınıñ uquq qoruyıcı organlarınıñ maqsadı – Bütündünya qırımtatar kongressine keder etmek ve Bütündünya qırımtatar kongressinde qabul etilecek er bir qarar ve beyannamelerniñ qanunsızlığını ilân etmektir», – deyler teşkilât azaları.
Bu sebepten «Qırımtatarlarnıñ qarşılıq areketi» narazılıq bildirdi ve Refat Çubarovğa qarşı cinaiy işniñ açılmasını lâğu etmege talap etti.
Qırımda Rusiye Federal havfsızlıq hızmeti (FSB) idaresiniñ taqiqat bölügi Qırımtatar Milliy Meclis reisine qarşı cinaiy işni açtı.
Bunı Qırım prokurorı Natalya Poklonskaya bildirdi. Onıñ sözlerine köre, cinaiy iş devletniñ topraq bütünliginiñ bozuluvına çağıruvları ile bağlı.
«Qırım Cumhuriyeti boyunca Rusiye Federal havfsızlıq hızmeti (FSB) idaresiniñ taqiqat bölügi devletniñ topraq bütünliginiñ deñiştirilmesi ile bağlı areketlerge çağırğan Çubarovğa nisbeten cinaiy iş açtı. Taqiqat çerçivesinde taqiqatçılar vatandaş Çubarovğa qarşı qanuniy qararlarnı çıqaracaqlar», – dey o.
Poklonskaya şunı da qayd etti ki, Refat Çubarov qıdıruvğa ilân etilecek.
Rusiye tarafından Qırım işğalini tanımağan dünyanıñ yüzlerce memleketiniñ yetekçileri «Rusiye topraq bütünliginiñ bozuluvı» cinaiy iş boyunca keçe bile
Rusiye tarafından Qırım işğalini tanımağan dünyanıñ yüzlerce memleketiniñ yetekçileri «Rusiye topraq bütünliginiñ bozuluvı» cinaiy iş boyunca keçe bile, – dep bildire Qırımtatar Milliy Meclis reisi Refat Çubarov. Bunı o Qırım prokurorı Natalya Poklonskayanıñ Çubarovğa nisbeten «devlet topraq bütünliginiñ bozuluvına çağıruv» cinaiy işniñ açılması aqta bildirüvine cevap olaraq ayttı.
«Rusiye FSB tarafından cinaiy işniñ açılması ve meni qıdıruvğa ilân etecekleri aqqında haberni İstanbulda bildim, şimdi Kiyevge yolcum. FSB «mantığına» köre, «Rusiye topraq bütünligine qast etüv» cinaiy işiniñ iştirakçileri Qırımnıñ Rusiye tarafından işğalini tanımağan daa dünyanıñ 100 memleketiniñ yetekçileri ola bile», – dedi o.
«Putin ile yaqında körüşkende Qırım mustaqil Ukraina qısmı olğanı aqta aytqan Merkel hanım içün qasevet çekmege başladım», – dedi Refat Çubarov.
