Link açıqlığı

Saatnıñ esas haberi

Moskva mahkemesi Qırımğa Meclis başınıñ keñeşçisine kiriş yasaqlığını lâğu etmedi


Moskva mahkemesinde Qırımtatar Milliy Meclis reisiniñ keñeşçisi İsmet Yükselniñ Rusiye ve işğal etilgen Qırım territoriyasına 5 yılğa – 2019 senesi iyün 30-na qadar kiriş yasaqlığı boyunca itirazını lâğu etti.

Bunı Meclisniñ matbuat hızmeti bildire.

«Arizacı ve temsilcilerine bu kibi qararnıñ çıqarılması boyunca iç bir sebep añlatılmadı, çünki FSB beyannamesi gizlene. FSB vekili «işniñ gizli qısmı» aydınlatqanda, İsmet Yükselniñ advokatı mahkeme salonından çıqarıldı», – denile beyanatta.

Mecliste deyler ki, imayeniñ aile birdemliginiñ ümdesi bozulğanı aqta delilleri mahkemeci tarafından lâğu etildi. Mahkemeci Yuukselniñ apayını üçünci şahıs olaraq celp etmege razı olmadı.

«Qırım sakinleriniñ Rusiyege kiriş yasağlığı ile bağlı mesele aqqında söz kete. Yani, FSB kiriş yasaqlığı aqqında qararı mahkeme ceetinden baqılmaz. Cemiyet de böyle qararnıñ doğru olğanına qıymet kesemez. Er şey gizlene ve insan boysunmaq kerek. Rusiyede istenilmez biri olğanı sebebinden kirişi yasaq etilgeni aqta bildireler. Amma o Rusiyege ıntılmadı, Rusiye mustaqilligi oña keldi. Demek, boysunmağan insanlarnıñ sürgüni yapıla», – dep bildire matbuat hızmeti advokat İllarion Vasilyevniñ sözlerini.

İsmet Yüksel Rusiyeniñ FSB qararına itiraz bildirmek içün mahkemede dava açqan edi. Şikâyet em Aqmescit, em de Moskvada berilgen edi. Aqmescitniñ Kiyev rayon mahkemesi şikâyetni baqmadı. Moskvanıñ Meşçanskiy rayon mahkemesi İsmet Yükselniñ işini yanvar 22-de baqtı. FSB vekilleri mahkemege kelmediler. Soñra FSB muracaatınen işni Moskva şeer mahkemesine berdiler.

Qırımtatar halqınıñ liderleri Mustafa Cemilev ve Refat Çubarovnıñ da yarımada işğalinden soñ Qırımğa kirişleri yasaq etildi.

XS
SM
MD
LG