Link açıqlığı

Saatnıñ esas haberi

«Qırımtatarlarnıñ qarşılıq areketi» Çubarovğa qol tutmağa çağıra


Qırımtatar Milliy Meclis reisi Refat Çubarovğa nisbeten FSB qararı qırımtatarlarnıñ menfaatına zarar ketire ve maqsadı – Rusiye Federatsiyasınıñ qanuniy alanında qırımtatarlarnıñ ayırımını qanuniyleştirmektir, – denile teşkilâtnıñ beyanatında.

Teşkilât iştirakçileriniñ fikrine köre, bu aqta narazılıqnı bildirmege ve insan aqları boyunca BMT şurasına şikâyet etmek kerek.

«Qırımtatar Milliy Meclis reisine nisbeten cinaiy işniñ açılması er bir qırımtatarğa tesir ete… Özüni qırımtatar olaraq sayğan er bir insan narazılıq kösterip, em prokuratura, em Rusiye Federatsiyası yolbaşçılığına mütenasip arizalar yollamaq kerek. «Qırımtatarlarnıñ qarşılıq areketi» iştirakçileri de şu aqta narazılıq azırlaylar», – deyler teşkilâtnıñ azaları.

Bunıñ ile şunı da qayd eteler ki, Ukraina Yuqarı Şurası yolbaşçılığı da Rusiye ve halqara teşkilâtlarına narazılıq yollamalı.

Qırımda Rusiye Federal havfsızlıq hızmeti (FSB) idaresiniñ taqiqat bölügi Qırımtatar Milliy Meclis reisine qarşı cinaiy işni açtı.

Bunı akimiyet tarafdarı Krıminform saytına Qırım prokurorı Natalya Poklonskaya bildirdi.

Onıñ sözlerine köre, cinaiy iş devletniñ topraq bütünliginiñ bozuluvına çağıruvları ile bağlı.

«Qırım Cumhuriyeti boyunca Rusiye Federal havfsızlıq hızmeti (FSB) idaresiniñ taqiqat bölügi devletniñ topraq bütünliginiñ deñiştirilmesi ile bağlı areketlerge çağırğan Çubarovğa nisbeten cinaiy iş açtı. Taqiqat çerçivesinde taqiqatçılar vatandaş Çubarovğa qarşı qanuniy qararlarnı çıqaracaqlar», – dey o.

Poklonskaya şunı da qayd etti ki, Refat Çubarov qıdıruvğa ilân etilecek.

XS
SM
MD
LG