Link açıqlığı

Aslan Qırımlı: Qırım meseleleri boyunca Devlet hızmetiniñ vazifesi – yarımadanıñ Ukrainağa qaytarılması


Cuma künü, mayıs 29-da, Ukraina Nazirler Kabineti yanındaki Qırım meseleleri boyunca Devlet hızmeti resmiy şekilde qayd olundı. Onıñ terkibine endi Rusiye tarafından işğal etilgen Qırımnı Ukrainağa qaytaracaq insanlarnı qabul etmege azırlar. Bunı Devlet hızmetiniñ başı Aslan Ömer Qırımlı Qırımdan mecburen köçip kelgenlerniñ ekinci Bütünukrain toplaşuvında bildirdi, haber ete Qırım.Aqiqat mühbiri.

Onıñ sözlerine köre, şimdilik hızmet teşkiliy suallerni çezecektir. Qırımlı aytqanı kibi, müessisege insanlarnı açıq yarış şeklinde qabul etecekler.

«Er ukrain mahsus anketanı toldurıp, hızmet hadimi ola bile. Esas vazifemiz – Qırımnı işğalden azat etmek ve Ukrainağa qaytarmaq», – dedi o.

Qırımlı şunı da qayd etti ki, yañı hızmet er bir köçip kelgen ve işğal olunğan topraqta qalğan vatandaşqa yardım etecektir.

Qurultay iştirakçilerini endi keçken sene neticeleri aqta haberdar ettiler.

Qırım.Aqiqat bildirgeni kibi, Kiyevde mayıs 29 künü Qırımdan mecburen köçip kelgenlerniñ ekinci Bütünukrain qurultayı başlandı.

Ukraina Nazirler Kabineti Qırımtatar Milliy Meclis reisiniñ muavini Aslan Ömer Qırımlını Qırım Muhtar Cumhuriyeti ve Aqyar şeeriniñ meseleleri boyunca Ukraina Devlet hızmeti reisi vazifesine 2015 senesi mayıs ortasında tayin etti.

2014 senesi mart ayında Rusiyeniñ Qırım işğalinden sebep bir çoq insan yarımadadan qıtaiy Ukrainağa köçmege başladı. Ukraina Fevqulâde vaziyetler devlet hızmetiniñ malümatına köre, 2015 senesi mayıs 23 kününe Qırım Muhtar Cumhuriyeti ve Aqyardan 20 biñ 626 insan köçip keldi.

XS
SM
MD
LG