İyün 5 künü Lvivde Muhammad Asad adına İslâm medeniy merkeziniñ açılış tedbiri ötkerilecek
Bunı Qırım.Aqiqatqa «Alraid» bütünukrain cemaat teşkilâtınıñ birliginde bildirdiler.
Teşkilâtta qayd etkenlerine köre, leyha «Umma» Ukraina musulmanlarınıñ diniy idaresi ve «En-Nebras» yerli diniy cemiyeti yardımı ile amelge keçirildi.
«Merkez yalıñız Lviv vilâyetinde yaşağan musulmanlarnıñ ruhiy ayatınıñ merkezi degil de, regionda medeniyetlerara ve dinlerara dialogınıñ teşkil etilmesine ve inkişafına yol berecek bir meydançıq olacaqtır», – deyler mında.
Bunıñ ile şunı da qayd eteler ki, bu Ukrainada endi doquzıncı merkez olacaqtır, amma tek Lviv merkezine musulman erbabınıñ adı berile.
Muhammad Asad (asıl adı – Leopold Vays) 1900 senesi Lvivde doğdı. O, islâmnıñ bütün dünya inkişafına büyük isse qoştı.
