Link açıqlığı

Qırımdan köçip kelgenlerniñ Bütünukrain toplaşuvında netice çıqaracaq ve bir sıra muracaatlarnı qabul etecekler


Cuma künü, Qırımdan mecburen köçip kelgenlerniñ ekinci Bütünukrain toplaşuvı vaqtında cemaat teşkilâtlarınıñ esabatlarını diñleycek ve kelecekke planlarını belgilecektirler.

Bunı Qırım.Aqiqatqa «Çetel işler maydanı» teşkilâtı bildirdi.

Tedbirniñ teşkilâtçısı – «Qırımdan mecburen köçip kelgenlerniñ cemaat teşkilâtlarınıñ koordinatsion şurası» cemaat birligi oldı. Toplaşuv iştirakçileri – Qırım cemaat teşebbüs ve teşkilâtlarınıñ azaları, faaller, jurnalistler, ekspertler.

Teşkilâtçılarnıñ malümatına köre, toplaşuv vaqtında bir sıra beyanname ve muracaat qabul etilecek.

Qırım.Aqiqat bildirgeni kibi, Qırımdan köçip kelgenlerniñ ekinci Bütünukrain toplaşuvı mayıs 29 künü Kiyevde saat 10:00 Ğalebe caddesi, 112 adresi boyunca keçirilecek.

Qırımdan mecburen köçip kelgenlerniñ birinci Bütünukrain qurultayı Kiyevde 2014 senesi mayıs 23-te keçirilgen edi.

2014 senesi mart ayında Rusiyeniñ Qırım işğalinden sebep bir çoq insan yarımadadan qıtaiy Ukrainağa köçmege başladı. Ukraina Fevqulâde vaziyetler devlet hızmetiniñ malümatına köre, 2015 senesi mayıs 23 kününe Qırım Muhtar Cumhuriyeti ve Aqyardan 20 biñ 626 insan köçip keldi.

XS
SM
MD
LG