Link açıqlığı

Nazirler şurasında akimiyet tarafında olacaq qırımtatar telekanalınıñ başını sayladılar


Qırımnıñ Rusiye ükümetinde «Millet» yañı qırımtatar telekanalınıñ başı namzetini belgilediler.

Qırım Nazirler şurasınıñ matbuat hızmetiniñ bildirüvinde aytılğanı kibi, milletlerara munasebetler devlet komitetiniñ reisi Zaur Smirnov dey ki, telekanal yolbaşçısı vazifesine «Pervıy krımskiy» telekanalınıñ qırımtatar ve milliy programmaları departamentiniñ şimdiki başı Seyran Mambetovnı teklif etecekler.

«Şimdi öz işini bilgen insanlardan bir taqım teşkil etilmekte. Bundan da ğayrı, telekanalnıñ cemaat şurasına yañı kanal başı vazifesine Seyran Mambetovnı teklif etip, oña insanlarnı tapmaq, kanal yolbaşçısı mesülietinde olğan işni alıp barmaq imkân berecekmiz», – dey Smirnov.

Onıñ malümatına köre, telekanal Rusiye qanuniyetine köre qayd etilmege azırlana. Efirge sentbâr ayında çıqacaqtır.

Aprel 1-den itibaren ATR yayınını toqtattı. Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.

Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.

ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.

XS
SM
MD
LG