Ukraina Nazirler Kabineti Yuqarı Şuranı Qırımnıñ vaqtınca işğaliniñ başlanmasını mart 27 degil de, fevral 20 künü olaraq belgilemege çağıra.
Böyle teklif «Muvaqqat işğalniñ başlanuv müddetiniñ belgilenmesi aqta Ukraina qanunlarına deñişüvlerniñ kirsetilmesi aqqında» Ukraina ükümetiniñ qanun leyhasında qayd etilgen.
«QMC Yuqarı Şurasınıñ zaptı 2014 senesi fevral 26 künü yüz berdi, Rusiye Silâlı Quvetleri tarafından Ukraina devlet sıñırınıñ bozuluvı ve yarımadanıñ ilerideki işğali maqsаdınen ukrain territoriyasında qanunsız sürette bulunuvı daa 2014 senesi fevral 20 künü başlandı», – denile qanun leyhasında.
Evel, 2015 senesi aprel 21 künü Ukraina Yuqarı Şurası «Rusiye Federatsiyasınıñ silâlı istilâsına qarşılıq ve aqibetlerniñ yoq etilmesi aqta» qararnı qabul etti, mında Rusiyeniñ Ukrainağa qarşı silâlı istilâsınıñ başlanması 2014 senesi fevral 20 künü ile bеlgilengen.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
