Ukraina Yuqarı Şurasınıñ deputatı Georgiy Logvinskiy Ukraina Qırımnı Kiyev nezaretine qaytarmaq içün bütün yuridik mehanizmlerini qullanmadı degen fikirdedir. Şu cümleden, dey deputat, Ukraina prezidenti Petro Poroşenko daa yıl evelsi BMT Halqara mahkemesine berecek olğan davası alâ azır degil.
Bunı o Qırım.Aqiqatqa bildirdi.
Logvinskiy şunı dey ki, bu meseleni Tış işler Nazirligi ögrenmeli. Halq deputatı aytqanı kibi, böyle davanıñ azırlanması mürekkep bir iştir ve Ukrainadan Rusiye ile muzakerelerniñ keçirilmesini talap ete.
«Qırım boyunca soñki tögerek masada Tış İşler Nazirliginiñ temsilcisinden BMT Halqara mahkemesi aqqında soradım. O, bu yönelişte çalışqanını ve yılnıñ soñuna qadar davanıñ azırlanılacağını bildirdi. Amma, menimce, bu meseleni soñuna qadar ketirmek içün zaruriy imkânlar qullanılmay», – dedi Logvinskiy.
Onıñ malümatına köre, bugünge Ukraina Rusiyege qarşı üç davanı açtı ve Rusiye Federatsiyasınıñ istilâsı aqta bildirgen şahsiy davalar ep berile.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
