Qırım ve Aqyarda iyün biri – Troitsa hristian bayramından ertesi künü – raatlıq künü olaraq ilân etilgen. Aqyar valisi Sergey Menâylonıñ mütenasip avalesi yerli akimiyetiniñ saytında bazartesi künü aşkâr etildi.
Qırım ükümeti işbu avaleni bir ay evelsi ilân etti.
Qıtaiy Ukrainada da iyünniñ biri raatlıq künü olaraq sayıla.
Evel bildirilgeni kibi, Qırım «spikeriniñ birinci muavini» Konstantin Baharev ve «spiker muavini» Remzi İlyasov «Qırım Cumhuriyetinde bayram ve hatıra künleri, zenaat bayramları ve diger müim künler aqqında» qanun leyhasını azırlağan ediler.
Vesiqağa binaen, Pasha, Troitsa, Oraza bayramı ve Qurban bayramı diniy bayramlar sayıla.
Bundan ğayrı, Qırımdaki müim vaqialarğa bağışlanğan hatıra sanlarını belgileme teklif etildi: yanvar 19 – Qırım devlet bayrağı künü, mart 18 – Qırım ve Aqyarnıñ Rusiye Federatsiyası terkibine qabul etüv aqqında añlaşma imzalanması künü, aprel 11 – Qırım Anayasası künü, mayıs 18 – Qırımdan sürgün olunğanlarnı añma künü, sentâbr 8 – Qırım cenkinde şehit ketken adamlarnı añma künü, dekabr 11 – natsizm qurbanları – qırımçaq ve yeudiylerni añma künü.
