Link açıqlığı

Mustafa Cemilev: Putinnen laf etmeуcem, terroristlernen muzakere keçirmeyim


Qırımtatar halqınıñ yetekçisi Mustafa Cemilev Rusiye prezidenti Vladimir Putin ile körüşmeycek, çünki «terroristlernen muzakerelerni keçirmey». Bunı Cemilev «Nastoyaşçeye vremâ» neşirine, Kremlden telefon etseler, Putinge ne dep aytır kibi sualge cevap olaraq dedi.

«Onıñ ile ne aqta laf etmege mümkün, bilmeyim. Sadece laf etmeуcem. Bıltır avgust ayında maña böyle teklif kelgen edi, Putin daa bir kere laf etecek olğan edi. Semereli subet olsa – yarın sizge bütün qapılar açılır, degen ediler. İsteseñiz – keri, Qırımğa. Oğluñız da azat etilir», – dedi Cemilev.

«Amma men böyle ayttım: «Demek, oğlum sizde reinedir? Terroristlerniñ areket tarzı. Padişañızğa aytıñ: terroristlernen muzakere keçirmeyim», – dedi qırımtatarlarnıñ yetekçisi.

Evel bildirilgeni kibi, 2014 senesi qırımtatar halqınıñ milliy yetekçisi Mustafa Cemilevge Rusiye prezidenti temsilcilerinden Vladimir Putin ile körüşmek kibi teklifler kele edi. Subet neticelerine köre, Rusiyede apiste olğan Cemilevniñ oğlu azat etile ve qırımtatarlarnıñ yetekçisi Vatanına qayta bilecegi aqqında aytqan ediler.

Rusiye Qırımğa kirişini yasaq etken Mustafa Cemilev Radio Svobodağa aytqanı kibi, oğlu şimdilik reine olaraq tutıla. Qırımtatarlarnıñ yetekçisi emindir ki, «Qırımnıñ işğali beş yıldan ziyade sürmez» ve o Vatanına qaytıp olur.

XS
SM
MD
LG