Qırımda mayıs 25 künü Yuqarı mahkeme Qırımtatar Milliy Meclisi reisiniñ yaqalanğan muavini Ahtem Çiygoznıñ adliyecisi Aleksandr Lesovoynınñ Aqmescitniñ Kiyev rayon mahkemesiniñ Çiygoznıñ apis müddetini uzatmaq qararına itiraz arizasını red etti.
Bunı Qırım.Aqiqatqa Qırımtatar Milliy Meclisiniñ reis muavini Nariman Celâl bildirdi.
Onıñ malümatına köre, Ahtem Çiygoznıñ özü mahkemede bulunmay edi. Mahkemede advokat, prokuror, ömür arqadaşı, tatası ve Meclis zenaatdaşları bulunğan edi.
«Mahkeme çoqqa sürmedi, advokatnıñ Çiygoznı apiste tutmağa iç bir sebep olmağanı aqta delillerine baqmadan, olduqça bir beklenilgen qarar edi. İşbu vaqialar Rusiyede degil de, Ukraina territoriyasında olıp keçkeni ve Ahtem Çiygoz da Ukraina vatandaşı olğanını bildirip, imayesi oña qarşı bildirilgen qabaatlarnı red etmege çalışa edi. Mahkeme, avdokatnıñ sözlerine baqmadan, itiraz arizasını qabul etmedi», – dedi Celâl.
O şunı da qayd etti ki, qarar çıqarmaq içün mahkemege bir qaç daqqa yeterli oldı.
«Mahkeme taraflarnı diñlep, 2-3 daqqağa çıqtı ve birden qaytıp, qararnı seslendirdi. Mahkeme kâtibi bile çıqmadı. Bu şunı tasdiqlay ki, qarar mahkemeden evel endi alınğan edi. Faqat biz başqasını beklemedik», – dey o.
Celâlnıñ aytqanı kibi, endi olar işke uquq qoruyıcı teşkilâtlarnı celp etecek ve «yañı mahkeme seviyesine çıqacaqtırlar».
Аhtem Çiygozoznı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar. Çiygoznı 2015 senesi fevral 19-ğa qadar apiske aldılar, soñra da bu müddetni mayıs 19-ğa qadar arttırdılar. Mayıs 15 künü mahkemeniñ nevbetteki toplaşuvında apis müddetini iyül 29-na qadar uzattılar.
Ukraina Baş prokuraturası yanındaki QMC prokuraturası Çiygoznıñ qanunsız yaqalanuvı boyunca cinaiy işni açtı.
