Moskvada mayıs 21 künü «Kümüş asır edebiyatı müzeyinde» «BİZİMQIRIM» şiiriy leyhasınıñ çerçivesinde edebiy oquvlar keçti.
Qırım şiiriy klubı ve «KRiK Publishing House» neşriyatı tarafından azırlanılğan ve AQŞ basılğan şiir cıyıntığı özüne Rusiye, Ukraina, Qırım, AQŞ, Litvaniya, Almaniya, İtaliya, Frenkistan, İrlandiya, Avstraliyа ve İsrailden 120 müellifniñ rus tilinde yazılğan Qırım aqqında şiirlerini sığdırdı.
Qırım.Aqiqatqa «BİZİMQIRIM» leyhasınıñ teşkilâtçıları bildirgeni kibi, prezentatsiyağa Qırımdan şair, bir sıra şiiriy mukâfat laureatı Andrey Polâkov keldi.
«Andrey Polâkov öz şiirlerini ve 34 yaşında vefat etken «Yarımada» Qırım-Moskva edebiy gruppasınıñ teşkilâtçılarından biri Mihail Laptevniñ metnlerini oqudı», – qayd eteler teşkilâtçılar.
Bunıñ ile prezentatsiyada Moskvada yaşağan müellifler iştirak etti: Yevgeniy Buunimoviç, Andrey Vasilevskiy, Aleksandr Volovik, Yevgeniy Haritonov, İgor Lovşin, German Vlasov, Oleg Babinov, Aleksandr Pereverzin, Aleksandr Lüsıy, Aleksandra Saşneva, ve Mariya Maksimova-Stolpnik. Bundan da ğayrı, Qırım aqqında öz şiirlerini daa eki şair – Valeriy Lobanov ve Viktor Kollegorskiy oqudılar.
Bunıñ ile cıyıntıqqa Qırım aqqında şiirleri kirgen rametli Yevgeniy Saburov (Tatyana Saburova oqudı) ve Ruslan Elinniñ (İgor Sid oqudı) eserleri de oquldı.
Leyha saytında aşkâr etilgen kontseptsiyağa köre, «işbu kitap – şiiriy barıştırıcı beyannamedir, Qırımnı edebiyat ve intellektual dialog meydanına, geosiyasetten geoşiiriyetke qaytarmaq ıntıluvıdır».
Küzde Kiyevde prezentatsiyasınıñ keçirilmesi beklenile.
Leyhanıñ teşkilâtçıları – aslı Qırımlı – Gennadiy Katsov ve İgor Sid. New Yorkta KRiK Publishing House basmahanesinde dekabr ayında neşir etilgen aynı serlevalı kitap matbuat vastalarında keñ muzakere etilgen edi.
