Aqmescit mekteplerinde mayıs 20 kününden «soñki çañ» bayramları başlandı, haber eteler Aqmescitniñ Rusiye şeer memuriyetinde.
Müessiseniñ malümatına köre, tantanalı tedbirler paytahtta mayıs 23 kününe qadar keçecektir.
Aqmescit şeer memuriyetiniñ başı Gennadiy Baharev aytqanı kibi, bu sene «soñki çañ» bayramına ayrı diqqat etmek kerek, çünki Aqmescit mektepleri tam bir sene Rusiye programması boyunca oqudılar.
O, şeer memuriyetiniñ struktura bölüklerine bayram tedbirlerine azırlıq ketişatında iştirak etmek ve 2015 mezunlarını hayrlamağa teklifi ile buyurdı.
Qırımnı öz nezareti altına alğan Rusiyede «soñki çañ» bayramı keçirilecek bir kün belgilenmegen. Er oquv yurtu bayram kününi özü saylay bile. Mayısnıñ 25 kününe kelgen birinci devlet imtianından evel olmalı.
Ukraina mekteplerinde Soñki çañ bayramları mayıs 29 künü keçirilecektir.
