Qırımda mayıs 21 künü faaller ve «İnter» telekanalı jurnalistleriniñ yaqalanuvı Rusiye politsiyası tarafından planlaştırılğan edi. Bunı Qırım.Aqiqatqa Ermeni Bazarnıñ İçki işler rayon bölüginde bir qaç saat bulunğan Veldar Şukurciyev bildirdi.
Onıñ sözlerine köre, bu «politsiya tesadüfi» degil, politsiya hadimleri evelden faallerni tutacaq edi.
«Bizni yavaş-yavaş quvmaqtalar. Daimiy basqı mehanizmi işletildi. Belli ki, er bir telefon subetimizni diñleyler, er bir adımımız – taqip etile», – dedi Veldar Şukurciyev.
Faali şunı qayd etti ki, bu kibi yaqalanuvlarnıñ maqsadı – farqlı tüşüngenlerni Qırımdan quvamaq ve digerlerge nasiat etmek.
Qırım.Aqiqat bildirgeni kibi, mayıs 21 künü «İnter» ukrain telekanalınıñ üç mühbirini ve Ukrainağa qoltutqan dört faalni Rusiye politsiyası Aqmescit-Ermeni Bazar yolunda yaqaladı. Faallerniñ malümatına köre, yaqalanğanlarnı rayon bölügine şahsiyetlerini belgilemek içün alıp keteler.
Ermeni Bazar şeeriniñ İçki işler rayon bölüginde olğan çoq saatlik sorğudan soñ yaqalanğan Leonid Küzmin, «İnter» telekanalınıñ operatorı Vitaliy Zâtkovskiy ve daa eki faalni azat ettiler
Küzmin aytqanı kibi, politsiya hadimleri fallerden olarnıñ Ermeni Bazarda ne iş yapqanları aqta soray ediler. Parmaq izlerini aldı, foto yaptılar
Qırım faalleri Leonid Küzmin ve Veldar Şukurciyev Aqmescitte mart 9-da Taras Şevçenkonı añma aktsiyasında yaqalanğan ediler. Mahkeme olarnı ukrain timsallerini qullanğanlarından sebep 40 saatlik mecburiy işelr ile cezaladı. Soñra ise cezanı deñiştirip, er birine 10 biñ rublelik para cezasını belgiledi. Faaller Qırımdaki Ukrain medeniyet merkeziniñ tesisçileri olalar.
