Rusiyede ukrain arbiy hızmetçisi Nadejda Savçenkonıñ işi boyunca ilk taqiqat soñuna yetti. Uçucı Donbassta eki Rusiye jurnalistiniñ ölüminde qabaatlana, işine daa eki yañı qabaat qoşuldı, – dedi cumaaqşamı künü Savçenkonıñ advokatı Mark Feygin öz twitterinde.
Adliyeci şunı dedi ki, nevbette iş malümatı ile tanışuv ketişatı başlana.
Aytqanı kibi, Savçenkonıñ işi boyunca mahkeme ketişatı qayda keçecegi aqta sual alâ daa açıq qala – ya Moskva, ya Voronejde.
Nadejda Savçenko keçken seneniñ iyül ayından itibaren Rusiye apishanesinde buluna. O, qabaatını red etip, separatistler tarafından esir alınğanını ve Ukrainadan Rusiyege qanunsız alda çıqarılğanını bildire.
Oktâbr 26-da olıp keçken Ukraina Yuqarı Radasınıñ nevbetten tış saylavlarında Savçenko «Batkivşçına» firqasınıñ cedvelinde birinci yerde edi ve sekizinci çağırılış Ukraina parlamentiniñ halq deputatı olaraq saylandı. Rada onı PACE eyyetiniñ erkânına kirsetti.
Mart 16-da ukrain uçucısı SİZOda açlıqqa tekrar başladı.
Çarşenbe künü Basman mahkemesi taqiqatnıñ Nadejda Savçenkonıñ apis cezasını iyün 30-ğa qadar arttırmaq muracaatını baqacaq, dep bildirdi mahkemeniñ matbuat kâtibi Anna Fadeyeva.
