Qırımda yaqalanğan Leonid Küzmin, «İnter» telekanalınıñ operatorı Vitaliy Zâtkovskiy ve daa eki faalni Ermeni Bazar şeeriniñ İçki işler rayon bölüginde olğan çoq saatlik sorğudan soñ azat ettiler. Küzmin aytqanı kibi, «İnter» jurnalisti Yuliya Krüçkova ve diger faaller alâ daa sorğudalar, – haber ete «Tsentr jurnalistskih rassledovaniy».
Küzmin aytqanı kibi, politsiya hadimleri fallerden olarnıñ Ermeni Bazarda ne iş yapqanları aqta soray ediler.
«Yapqanımız aqta izaatlarımıznı aldılar. Parmaq izlerimizni aldı, foto yaptılar. Nege kerek sorasaq: «Yarın siznen bir şey olsa, sizni nasıl taparmız. Mında başsız cesetler tapıla» – kibi cevapnı aldıq, – dep tarif ete o.
«İnter» ukrain telekanalınıñ üç mühbirini ve Ukrainağa qoltutqan dört faalni Rusiye politsiyası Aqmescit-Ermeni Bazar yolunda yaqaladı.
Qırım faalleri Leonid Küzmin ve Veldar Şukurciyev Aqmescitte mart 9-da Taras Şevçenkonı añma aktsiyasında yaqalanğan ediler. Mahkeme olarnı ukrain timsallerini qullanğanlarından sebep 40 saatlik mecburiy işelr ile cezaladı. Soñra ise cezanı deñiştirip, er birine 10 biñ rublelik para cezasını belgiledi. Faaller Qırımdaki Ukrain medeniyet merkeziniñ tesisçileri olalar.
