«İnter» ukrain telekanalınıñ üç mühbirini ve Ukrainağa qoltutqan dört faalni Rusiye politsiyası Aqmescit-Ermeni Bazar yolunda yaqaladı.
Bunı İnsan aqları Qırım alan missiyası bildire.
«Jurnalistler ve faaller farqlı maşinalarda kete ediler. «İnter» telekanalınıñ jurnalisti Yuliya Krüçkovanıñ malümatına köre, er kesni Ermeni Bazarnıñ İçki işler rayon bölügine sorğuğa alıp keteler», – dep bildireler uquq qorçalayıcılar.
Yaqalanğan faallerden biri Veldar Şukurciyev bildirgenine köre, olarnıñ maşinasını yasaq etilgen şeylerni qıdırmaq içün toqtattılar. Politsiya bir şey tapmadı.
Faallerniñ malümatına köre, yaqalanğanlarnı rayon bölügine şahsiyetlerini belgilemek içün alıp keteler.
«Yaqalanğanlarnıñ bildirgenine köre, olarnıñ vesiqaları yanında, lâkin politsiya bunıñ yeterli olğanını tüşünmey», – dep bildireler uquq qorçalayıcılar.
Diger malümatlar yoq. Qırımnıñ uquq qoruyıcı organları da resmiy malümat bermey.
Qırım faalleri Leonid Küzmin ve Veldar Şukurciyev Aqmescitte mart 9-da Taras Şevçenkonı añma aktsiyasında yaqalanğan ediler. Mahkeme olarnı ukrain timsallerini qullanğanlarından sebep 40 saatlik mecburiy işelr ile cezaladı. Soñra ise cezanı deñiştirip, er birine 10 biñ rublelik para cezasını belgiledi. Faaller Qırımdaki Ukrain medeniyet merkeziniñ tesisçileri olalar.
