Qırımdan tış bulunğan ve topraq icaresi bergisini ödemegen qırımlılar topraqtan marum qala bileler, dep ayttı Qırımnıñ Rusiye Devlet şurasınıñ iqtisadiyat, bücet-maliye ve bergi siyasetiniñ komitet reisi Vitaliy Nahlupin, dep haber ete Qırım ükümetiniñ «ruporı» Krıminform saytı.
Nahlupin 2-3 ay devamında topraq bergisi ödenmegen olsa, yerli akimiyet organlarına topraq icaresi añlaşmalarını bozmağa teklif ete.
«Topraq ödemeleri probleması bar. O, cumhuriyetniñ tışında olğan topraq saiplerinen bağlı. Mında ciddiy memuriy qararlar olmalı, dep tüşünem. 2, eñ çoq 3 ay devamında ödeme olmasa, belediye organlarınıñ areketi belgilenmeli», – dep qayd etti Nahlupin.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Ukraina içtimaiy siyaset nazirliginiñ soñki malümatlarına köre, Donbass ve Qırımdan köçip kelgen insanlarnıñ sayısı 1 million 290 biñ insannı teşkil etti. Qırımtatarlarnıñ milliy lideri Mustafa Cemilev bildirdi ki, Qırım işğali devamında 35 biñ kişi Qırımnı terk etti, olardan yarısı – qırımtatarlardır.
