Qırımtatarlarnıñ milliy lideri Mustafa Cemilevniñ oğlunıñ mahkeme işinde teneffüs ilân etildi. Bunı Hayser Cemilevniñ adliyecisi Nikolay Polozov bildire.
Onıñ malümatına köre, mahkeme mayıs 27-ge qadar teneffüsni ilân etip, «imayege Hayser Cemilev malümat berecekmi-yoqmı qarar almağa» imkân berdi.
Adliyeci bildire ki, Krasnodar ülkesi mahkemesinde mayıs 20-de Qırımdan üç şaat sorğuğa çekildi ve daa ekisiniñ, şu cümleden Mustafa Cemilevniñ malümatı aydınlatıldı.
«Onı sorğuğa çekemediler», – dep yazdı Polozov Twitterde.
Kence Cemilevniñ işi Krasnodarda mahkemeciler olmağanlarnıñ iştiraki ile baqılмa. Rusiye kütleviy haber vastalarınıñ malümatına köre, mahkeme taqiqatınıñ bu basamağında Hayser Cemilevniñ qabaatını devlet tarafı köstere, prokurorlar şaat ve zarar körgenlerni sorğuğa çekti.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler. Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire.
Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.
