Berlinde qırımtatar sürgünliginiñ 71 yıllığı çerçivesinde keçirilgen «Quo vadis, Krim?» (Qırım, qayda ketesiñ?) halqara forumınıñ neticesinde zemaneviy Qırımdaki vaziyet aqqında kitapnı bastırmağa planlaştırıla.
Bunı forum teşkilâtçıları Qırım.Aqiqatqa bildirdiler.
«Forum körüşüviniñ esas neticelerinden biri – iştirakçilerniñ maruzaları kirecek kitap bastırılmasıdır. Olarnıñ öz noqtaiy-nazarını bildirmek imkânları olacaq, çünki konferentsiyadaki çıqışlar qısqa oldı», – dep qayd ettiler teşkilâtçılar.
Olarnıñ malümatına köre, kitap sentâbr ayında çıqacaq ve qırımtatar mevzularını aydınlatqan internet saifesi olacaq: www.krimtataren.eu.
Forumda seslendirilgen maruza ve çıqışlarnen bu saifede qısqadan tanış olmaq mümkün. Kitap ise tafsilâtlı olacaq, bu saifeniñ ilâvesi olaraq tanıtılacaq.
Bunıñ kibi körüşüvlerni muntazam sürette keçirmege qarar alındı, devletten tış teşkilâtlar ve tedqiq institutları ise olarnı planlaştıracaqlar.
Teşkilâtçılarnıñ aytqanına köre, forum toplaşuvlarında Almaniya ilmiy-tedqiq merkezleriniñ alimleri, Qırımtatar Milliy Meclisiniñ azaları, alman, ukrain ve Qırım devletten tış uquq qorçalayıcı teşkilâtlarınıñ faalleri, ekspertler iştirak ettiler. Maruza ve muzakerelerde olar yalıñız qırımtatarlarnı degil, Rusiye tarafından işğal etilgen yarımadada yaşağan ukrainler ve diger millet temsilcilerini qasevetlendirgen suallerge cevap tapmağa tırıştılar.
Qırımnıñ tamır halqına yapılğan basqı, söz ve numayış serbestliginiñ sıñırları aqqında aytıldı.
Kelecek sene Almaniya «Qırımtatarlarnıñ medeniyet aftasını» keçirmege planlaştıra.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Uquq qorçalayıcılar, şu cümleden halqara, maruzalarında yarımadada şimdiki akimiyet tarafından eñ büyük basqı qırımtatarlarğa yapılğanını bildireler. Qırım akimiyeti bunı red ete.
