Link açıqlığı

Saatnıñ esas haberi

Rigada «Şarqiy işbirlik» sammiti başlana: Ukraina vizasız rejimniñ künü aqqında malümat bekley


Latviyanıñ paytahtı Rigada cumaaqşamı künü, mayıs 21-de, «Şarqiy işbirlik» eki künlik sammiti başlana. Avropa Birliginiñ liderleri altı qomşu memleketinden iş ortaqlarınen körüşecekler: Ukraina, Aqrusiye, Gürcistan, Moldova, Azerbaycan ve Ermenistan.

«Şarqiy işbirlik» sammiti keçken sefer 2013 senesi noyabr ayında Vilniuste olıp keçken edi, o vaqıt Ukraina prezidenti olğan Viktor Yanukoviç Ukraina Assotsiatsiya añlaşmasını baqmaycağını bildirdi. Maydan adiseleri bitken ve Yanukoviçniñ rejimi yoq etilgen soñ yarım yıldan soñ Ukraina Avropa Birligi ile añlaşmanı imzaladı.

Riga forumı arfesinde Ukraina tış işler naziri Pavlo Kpimkin bildirdi ki, Rigadaki «Şarqiy işbirlik» sammitinde ukrain tarafı içün eñ müim netice Avropa Birliginiñ vizasız rejimi aqqında müddetler malümatı olmaq kerek.

«Şarqiy işbirlik» sammitinde Ukraina Avropa Birligi ile vizasız rejimni, soñra ise eñ azından onı ne vaqıt kirsetecekler kibi malümatnı almaq istey. Keçken afta Avropa komissiyası Ukrainanıñ vizasız rejimni almaq içün yapqan areketleri boyunca esabatnı aydınlattı, oña köre Ukraina bu sammitte istegenini alamaz: esabatta Ukraina şimdilik bütün vazifelerini yerine ketirmegeni qayt etile. Brussel bildirdi ki, bu seneniñ soñunda vizasız rejimge azırlıq aqqında esabatnı taqdim etmege azır. O, müsbet olsa, Ukraina vatandaşları 2016 senesi Avropa Birligi ile vizasız rejimni qazana bileler.

«Şarqiy işbirlik» programması – 2009 senesinden itibaren Avropa Birligi memleketleri tarafından meydanğa ketirilgen teşebbüstir.

O, altı memleketni qaplap ala: Ukraina, Aqrusiye, Gürcistan, Ermenistan, Azerbaycan ve Moldova. Programmanıñ maqsadı – bu memleketler ile farqlı alanlarda işbirligini kenişletmek, siyasiy assotsiatsiya, serbest ticaret alanını muzakere etmektir.

XS
SM
MD
LG