Link açıqlığı

Saatnıñ esas haberi

Kiyev ve Qırımda Vışivanka kününe qoşulmağa çağıralar


Cumaaqşamı künü, mayıs 21-de, Ukrainanıñ şeerlerinde Vışivanka (ukrain milliy kölmegi – muar.) kününi «Er kes vışivankada» bütün ukrain flash mobı ile keçireceker. Cemaat faalleri aktsiyağa qoltutmağa çağırdılar.

Tedbir maqsadı – ukrain halqınıñ birlik timsali olaraq vışivankanı – ukrain milliy qıyafetini kiymek.

Mayıs 21-de Kiyevdeki Maydanda saat 18:30-da «Vışivankalarda foto» aktsiyası ötkerilecek. Aktsiyada bir qaç yüz insan iştirak etecegi beklenile, fotoresimni Kiyevniñ tarih müzeyi ve İvan Gonçar adına müzeyniñ Milliy medeniyet milliy merkezine berecekler.

«Kiyevpastrans» müessisesiniñ konduktorlarına işke vışivankalarda kelmege teklif ettiler. Müessiseniñ bildirgenine köre, bahşış ala bilmek içün yolcular da vışivankanı kiyip, konduktor ile tramvay, trolleybus ya da avtobusta foto çıqarmaq kerekler.

Çeteldeki ukrainer, em de Qırım ukrainleri aktsiyağa qoşulmaq isteyler.

Tünevin Qırımdaki Ukrain medeniyet merkeziniñ faalleri yarımada sakinlerini flash mobqa qoşulmağa çağırdılar – vışivankanı kiyip, foto çıqarmağa ve içtimaiy ağlarda izaatlar ile qoymağa teklif etile. Vışivankası olmağanlarğa Qırım ukrainleri adamnı ukrain medeniyetini sevgen birisi olaraq aks ettirecek bir şey ile foto çıqarmağa çağıralar.

Er yıl mayısnıñ üçünci cumaaqşamı künü halq ananelerini saqlap qalmaq içün bütün Ukraina vışivanka künü qayd etile. Bu künniñ resmiy statusı yoq.

XS
SM
MD
LG