Link açıqlığı

Geoffrey Pyatt: AQŞ qırımtatarlarğa, şu cümleden – qırımtatarlarğa yardım etecek


Ukraina AQŞ elçisi Geoffrey Pyatt

AQŞ «Rusiye istilâsınıñ qurbanları olğan qırımlılarğa» yardım etmege devam etecek, ve onı arttıracaqlar. Bunı Ukraina AQŞ elçisi Geoffrey Pyatt Qırım.Aqiqatqa bildirdi.

Elçiniñ aytqanına köre, er bir qırımlı aqqında laf kete, qırımtatar halqına ise «ayrı diqqat» ayırılacaq.

«Qırımtatarlarğa berilecek yardımğa ayrı diqqat ayırıla, ve men Mustafa Cemilev ve bu halqnıñ diger liderlerini tanığanımdan ğurur duyam», – dep ayttı Geoffrey Pyatt.

«Bizler, şübesiz, qırımtatarlarnıñ cesürligini qayd etemiz. Keçken seneniñ eñ sevimli fotoresimlerden biri – Barack Obama ve Mustafa Cemilevniñ Varşavada «Birdemlik» yıllığında yapqan fotoresimi, men de anda bar edim», – dep ayttı o.

Ukraina AQŞ elçisi Ukraina prezidenti Petro Poroşenko ve baş nazir Arseniy Yatsenükniñ «mevam sebatını» qayd etti.

«Qırım Ukrainanıñ parçası olıp qala – AQŞ bu meselede mevamı deñişmez. Rusiyege qarşı kirsetken cezalarımız qalacaq. Bu noqtada şübe yoq», – dep qayd etti elçi.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG