Türkiye prezidenti Recep Tayip Erdoğan qırımtatarlarnıñ lideri, Ukraina halq deputatı Mustafa Cemilev ile qırımtatar sürgünliginiñ 71 yıllığı munasebetinen telefon vastasınen bağlandı. Bunı Ukraina halq deputatınıñ matbuat hızmeti Facebookta bildire.
«Türkiye devletiniñ yolbaşçısı memuriyetinde olğan qaynaqlarnıñ malümatına köre, Erdoğan Cemilevge Türkiye matem künlerinde qırımtatar semetdeşlerine birdemlik köstergenini ayttı», – dep aytıla beyanatta.
Matbuat hızmeti bildire ki, Türkiye prezidentiniñ bunıñnen bağlı muracaatı aydınlatılğan edi.
«Qırımtatar halqı oğrağan sürgünlik tarihnıñ qara saifesi olıp, iç bir vaqıt unutulmaycaq», – dep ayttı Recep Tayip Erdoğan.
«Türkiye ukrain buhranınıñ başlanmasından itibaren qırımtatarlarnıñ barışığvı, inkişafı ve havfsızlığına emiyet bergen edi», – dep ayttı Türkiye prezidenti.
Onıñ aytqanına köre, bugünki adise-vaqialar «qasevetlendire».
Erdoğannıñ bildirgenine köre, yerli Rusiye akimiyetiniñ qırımtatarlarğa mayıs 18-de matem yürüşi ve mitingini keçirmek yasağı qabul etilemez.
Mustafa Cemilev Erdoğanğa «Qırımğa qoltutqanı içün» teşekkürler bildirdi.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
