Ukraina Milliy havfsızlıq ve mudafaa şurasınıñ (RNBO) kâtibi Aleksandr Turçinovnıñ fikirince, Rusiyege qarşı cezalar quvetleştirilmek kerek. Onıñ zanınca, Rusiyege basqı usullarından biri Rusiye gemilerine Qara deñizde İstanbul boğazından keçmek yasağı ola bile.
Bunı o Ukrinform agentligine bildirdi.
«Rusiyeden dünyağa kelgen telükege aynı cevap ve areket olmalı. Mence, cezalar arasına olarnıñ arbiy gemilerini İstanbul boğazından keçmemesini, SWIFT sistemasından özek programmalarına qoltutqan ve maliye etken Rusiye maliye sistemasını söndürüv, em de diger ciddiy adımlar olmalı», – dep ayttı Turçinov agentlikke bergen intervyüsında.
O, Qırımda Rusiye silâsınıñ qoşma ücüm sistemalarınıñ açılmasın, em de özek silâsını hatırlattı. Turçinovnıñ fikirince, Rusiyeniñ yarımadada yapqan areketleri yalıñız Ukraina içün telükeli degil.
«Bu bizni pek qasevetlendire, çünki Qırımdaki özek silâsı ilk evelâ Avropa memleketlerine qarşı yöneltilecek. Bundan ğayrı, Türkiye içün de büyük telüke bar, o, NATO azası ola», – dep ayttı Turçinov.
Qara deñizde İstanbul boğazından keçüvni Türkiye Cumhuriyeti nezaret ete.
Ukraina, AQŞ, Avropa Birligi Rusiyeni qanunsız Qırım işğalinde ve Donbass zıddiyetinde boyeviklerge köstergen yardımında qabaatlaylar. Moskva qabaatını red etip, Ukrainada «göñülliler» cenkleşkenini bildire.
