Qırımtatarlarniñ milliy lideri Mustafa Cemilevniñ oğlu Hayser Cemilevniñ imaye şaatlarını Krasnodar ülkesi mahkemesinde videobağ vastasınen sorğuğa çekecekler. Kence Cemilevni öldürüvde qabaatlaylar.
Bu aqqında Hayser Cemilevniñ adliyecisi Nikolay Polozov bildire.
«Tünevin mahkeme Hayser Cemilev imayesiniñ şaatlarnıñ sorğusını keçirmek muracaatını qabul etti. Sorğu Qırım ile videokonferentsiya rejiminde keçirilecek», – dep yazdı Polozov mayıs 20-de Twitterde.
Çarşenbe künü, mayıs 20-de, Krasnodar ülkesi mahkemesinde qırımtatar halqınıñ milliy lideri Mustafa Cemilevniñ oğlu Hayser Cemilevniñ işi boyunca mahkeme keçirilecek. Mayıs 19-da mahkemede qabaat tarafı iş delillerini kösterdi.
Kence Cemilevniñ işi Krasnodarda mahkemeciler olmağanlarnıñ iştiraki ile baqılмa. Rusiye kütleviy haber vastalarınıñ malümatına köre, mahkeme taqiqatınıñ bu basamağında Hayser Cemilevniñ qabaatını devlet tarafı köstere, prokurorlar şaat ve zarar körgenlerni sorğuğa çekti.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.
Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler. Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire.
Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.
