Qırımnıñ Rusiye Devlet şurasınıñ reisi Vladimir Konstantinov Qırım malümat nazirligini ukrain kütleviy haber vastalarında çıqqan haberlerge qarşı yarımadanıñ teşviqatını yapmağa çağıra.
Bunı o çarşenbe künü Devlet şurasınıñ toplaşuvında ayttı, dep haber ete Qırım.Aqiqat.
«Bizler duşman malümat saasında bulunamız. Ukraina biz ile cenleşe, bizim tarafımızğa yalan ve nefret ata. Bu yalan ve nefret esasında ukrainlerniñ yañı nesili şekillene. Buña qarşı çıqmaq kerek, zemaneviy Qırım, «Qırım baarini» yapqan ğayelerniñ teşviqatını teşkil etmek kerek. Ciddiy bir iş olmalı, raat oturmaq mümkün degil! Qırım ile malümat cenki basa-bas kete», – dep aytt Konstantinov.
Qırımnıñ şimdiki malümat naziri, Qırım baş naziriniñ muavini Dmitriy Polonskiy mayıs 20-de Qırım parlamentinde nazirlikniñ işi aqqında esabatını seslendirdi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
