Ukraina Yuqar Radası «Köçip kelgenlerniñ aq-uquqları ve serbestligine riayet etüv kefaletlerini quvetleştirecek Ukrainanıñ bazı qanunlarına deñişmeler kirsetilüvi aqqında» qanun leyhasını birinci oquvda qabul etti.
Ukraina halq deputatı Georgiy Logvinskiy dedi ki, bu deñişmeler köçip kelgenler içün kâğıt işlerini qolaylaştıra.
«Kirsetilgen deñişmelerniñ vazifesi – memleket içinde köçip kelgenler içün kâğıt işlerini qolaylarştırmaq ve tezleştirmek. İş tapılmasını qolaylaştırmaq, işsiz statusını almaq, vesiqalarnı ğayrıdan tiklemek ve il.», – dep qayd ete Logvinskiy.
Vesiqa köçip kelgenlerge vesiqanı aluv tedbirlerini qolaylaştırmağa, yaşağan yerini qayd etmemege, cedvelge aluv vesiqalarını lâğu etmege teklif ete.
Ukraina içtimaiy siyaset nazirliginiñ soñki malümatlarına köre, Donbass ve Qırımdan köçip kelgen insanlarnıñ sayısı 1 million 290 biñ insannı teşkil etti. Qırımtatarlarnıñ milliy lideri Mustafa Cemilev bildirdi ki, Qırım işğali devamında 35 biñ kişi Qırımnı terk etti, olardan yarısı – qırımtatarlardır.
