Salı künü, mayıs 19-da, «Demokratiçeskiy Peterburg» areketi ve «Qırım» cemiyeti «Otkrıtoye prostranstvo» yardımı ile Peterburgda qırımtatar halqı sürgünliginiñ 71yıllığına bağışlanğan hatıra kününi keçirdiler, dep haber ete Radio Svoboda.
Aqşam tahminen on faal Nevskiy caddesinde birer-birer piketke turıp, facia aqqında hatırlatqan levhalarnı tuttılar: «Basqı ve halq sürgünlikleri – bir daa olmaycaq», «Qırım – Ukrainadır! Qırım işğali – Stalinniñ halqara siyasetine ve qırımtatarlarğa qarşı basqılarğa qaytuv», «Stalinden Putinge qadar: qırımtatarlarğa qarşı cinayetler devam ete».
Yanında keçkenler toqtalıp, levhalarnı baqa ve bazıda qoltuta ediler. Piket iştirakçilerinden birinde levhadan ğayrı qırımtatar bayrağı bar edi, digeri 1944 senesi sürgünligi aqqında malümat ile risalelerni tarqattı.
Teşkilâtçılar «Vkontakte» içtimaiy ağında aktsiya ve bu facia, em de Qırımnıñ şimdiki vaziyeti aqqında malümatnı yerleştirdiler: «Qırımdaki vaziyet, qırımtatar cemiyetiniñ eñ faallerini sıqıştıruv «melez sürgünligi» ola. Biñlernen qırımtatarı vatanını terk etmege mecburlar. Sürgünlik yıllığında Qırım akimiyeti matem mitingini keçirmege yasaq etti. Meclis reisiniñ muavini Ahtem Çiygoz apiste qanunsız alda tutula, onı keken sene olıp keçken adise-vaqialarnıñ teşkil etilmesinde sebepsiz qabaatlaylar».
Mayıs 18-de Kiyevde ve Ukrainanıñ diger şeerlerinde, em de çetelde Qırımtatar halqı sürgünliginiñ qurbanlarınıñ hatırasına matem tedbirleri olıp keçti. Bu kün 1944 senesi yarımadadan qırımtatarlarnen tolu birinci eşelon Orta Asiyağa yollanğan edi.
