Link açıqlığı

Kence Cemilevniñ adliyecileri Krasnodar mahkemesinde üç şaatnı sorğuğa çekmege azırlanalar


Hayser Cemilev

Çarşenbe künü, mayıs 20-de, Krasnodar ülkesi mahkemesinde qırımtatar halqınıñ milliy lideri Mustafa Cemilevniñ oğlu Hayser Cemilevniñ işi boyunca mahkeme keçirilecek. Onıñ imayesi mahkemege üç şaatnı çağırmaq kerek.

Bunı Hayser Cemilevniñ adliyecisi Nikolay Polozov bildire.

Onıñ malümatına köre, mayıs 19-da mahkemede qabaat tarafı iş delillerini kösterdi.

«Qabaat yazma delillerni kösterdi, esasen ekspertizalar», – dep yazdı o Twitterde.

Adliyeciniñ bildirgenine köre, mahkemeci olmağanlarğa taqiqat areketleriniñ videosını kösterdiler.

Kence Cemilevniñ işi Krasnodarda mahkemeciler olmağanlarnıñ iştiraki ile baqıla. Rusiye kütleviy haber vastalarınıñ malümatına köre, mahkeme taqiqatınıñ bu basamağında Hayser Cemilevniñ qabaatını devlet tarafı köstere, prokurorlar şaat ve zarar körgenlerni sorğuğa çekti.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler. Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire.

Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG