Link açıqlığı

«Yabloko» firqası Moskvada salı künü, mayıs 19-da, şeer yolbaşçılığı yanında sürgün etilgen halqlarnıñ hatırasına numayışlarnı keçirdi. Aktsiya Moskva Krasnoperçerskaya zastava ve Zafer meydanında numayışlarnı keçirmege izin bermegeninden soñ ötkerildi. Bu aqta «Yabloko» firqasınıñ saytında aytıla.

Aktsiyanı Ksenofobiyağa qarşılıq Komiteti teşkil etti. Stalin ükümdarlığı vaqtında topraqlarından sürgün etilgen qırımtatar ve diger halqlarnıñ hatırasına bağışlanğan.

Moskva sakinleri ellerinde plakatlarnı tutıp, Tverskaya soqağınıñ eki tarafında tura edi. Plakatlarda sürgün etilgen halqlar aqqında malümat yazılğan edi: 1937 senesi – 95 biñ kurd, 172 biñ koreyalı, 1941 – 438 biñ alman, 1942 senesi – 28 biñ finn, 1943 – 69 biñ qaraçay ve 95 biñ kalmık, 1944 senesi – 37 biñ balqar, 478 biñ çeçen ve inguş sürgün etildi.

«Yabloko» siyasiy komitetiniñ kâtibi Galina Mihaleva jurnalistlerge aytqanı kibi, bu kibi aktsiyalarnıñ yasaq etilmesi – sürgün etilgen halqlarğa şeer yolbaşçılığınıñ duşmanlığını kösterile.

Qırımtatar halqınıñ 71 yıllığına «Yabloko» firqası aşkâr etken bildirüvge köre, «sürgünlik yıllığına bağışlanğan tedbirlerniñ yasaq etilmesi repressiyalarğa oğrağan halqlarnıñ aqları alâ daa tiklenilmegenini tasdiqlay».

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG