Link açıqlığı

Qırımda Rusiye Federal migratsion hızmetiniñ vatandaşlıq, mesken ve readmissiya bölüginiñ yolbaşçısı İrina Boyko bildire ki, yarımadada Ukraina vatandaşlığından vazgeçmege istegenlerniñ 19 biñ arizası mevcut.

Memurnıñ bu cevabı memleket akimiyeti organlarınıñ faaliyeti aqqında malümat almaq içün resmiy muracaat etken «RosOtvet» Rusiye hızmetine keldi.

«Böyle ariza (vatandaşlıqtan vazgeçüv – muar.) Federal migratsion hızmetiniñ territorial organına yaşağan yerinde ya da bulunğan yerinde berile. Arizağa Ukraina ve Rusiye vatandaşınıñ pasportı, ya da Ukraina vatandaşlığını tasdıqlağan çetel devleti (Ukraina) vekâletli organı bergen diger vesiqa ilâve etile. Al-azırda Qırım Cumhuriyeti boyunca Rusiye FMH İdaresi tahminen 19 biñ arizanı qabul etti», – dep aytıla cevapta.

Boyko mayıs başında Qırımda Rusiye Federal migratsion hızmeti yerli sakinlerden Ukraina vatandaşlığından vazgeçmek istekleri ile arizalarını qabul etmege başlağanını tasdıqladı.

«№6 Federal qanunnıñ 4-ünci maddesiniñ 1-inci qısmına köre Rusiye Federatsiyasınıñ vatandaşı olaraq tanılğan ve Rusiye Federatsiyası pasportını alğan şahıslar Rusiyede çetel devletniñ vatandaşı olaraq sayılmamaq içün diger devletniñ, yani Ukraina devletiniñ vatandaşı olmaq istemegenini ariza şeklinde bildirmek kerekler», – dep añlattı memur.

Rusiye FMH bergen malümatına köre, Qırımda 3500 ukrain Rusiye vatandaşlığından vazgeçti. Uquq qorçalayıcılar qayd ete ki, ariza yazmağan, amma Rusiye pasportını almağanlar çoq.

Ekspertlerniñ aytqanına köre, Qırımda qaç kişi Rusiye pasportını almaq istemey kibi doğru malümat yoq.

XS
SM
MD
LG