Link açıqlığı

Ukraina malümat siyaseti naziri Yuriy Stetsniñ fikirince, Qırım işğaline qarşı narazılıq bildirgen ve yarımadada ölü tapılğan qırımtatar faali Reşat Ametovğa «Ukraina Qaramanı» unvanı berilmeli.

Bu aqqında nazirniñ qırımtatar sürgünliginiñ 71 yıllığı ile bağlı muracaatında aytıla.

«Bizler yalıñız qırımtatar halqı genotsidiniñ qurbanlarını degil, keçken sene yüz bergen Rusiye işğaliniñ qurbanlarını da hatırlaymız. İşğalcilerniñ birinci qurbanı – Reşat Ametov – ölümden soñ «Ukraina Qaramanı» unvanını almalı», – dep aytıla beyanatta.

Stetsniñ bildirgenine köre, Ukraina devleti 2014 senesi fevral 26-da Aqmescitteki mitingde Ukrainanıñ topraq bütünligine qoltutmaq içün iştirak etken ve al-azırda mahküm etilgen Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci ve ATR telekanalınıñ operatorı Ernest Nebiyevni azat ettirmek içün elinden kelgenini yapacaq.

2014 senesi mart ayınıñ başında 39 yaşında Aqmescit sakini, üç balanıñ babası Reşat Ametov Aqmescitte Nazirler şurasınıñ binası yanına bir özü piketke çıqıp, Rusiyeniñ Qırım istilâsına qarşı narazılıq bildirdi. Narazılıq aktsiyasında «samooboronanıñ» bir qaç vekili onı maşinağa oturtıp, belgisiz bir yerge alıp kettiler.

2014 senesi mart 15-te Reşat Ametov Qarasuvbazar rayonınıñ Ortalan (Zemlâniçnoye) köyü yanında ölü tapıldı. Er kişiniñ bedeninde azap izleri, yanında ise kelepçe tapıldı. Ölüm sebebi közüne tıqtırılğan pıçaq yarası oldı.

Mart 18-de Ametovnı Aqmescit mezarlığında defn ettiler. Cinaiy iş açıldı. Cumhuriyetniñ yolbaşçısı Sergey Aksenov «samooborona» vekilleriniñ Reşat Ametovnıñ ölümine ve qaçırılmasına alâqası olmağanını bildire.

Bir yıldan soñ öldürilgenniñ tuvğanlarına iş taqiqatı toqtatılğanını bildirdiler, çünki cinayetçilerni tapmaq imkânsız eken.

XS
SM
MD
LG